وصلت لباب قسم الدقي.. استوقفني البني آدم اللي واقف عليه .. أنا مش عارف بيسموه ايه .. مخبر ولا أمين شرطة ولا مباحث ولا ايه بس هو كان لابس مدني ..
المهم قاللي: أؤمر؟؟
قولتله: عربيتي اتسرقت؟
قاللي: ايه اللي اتسرق منها ؟
قولتله : أنا مش لاقي عربيتي أصلا.
طبعا اندهش وقال عربيتك كلها اتسرقت على بعضها؟؟!! الكلام ده حصل فين؟
حكيتله التفاصيل اللي حكيتهالكو في الحلقة السابقة ..
قام مندهشا وخذني معاه وطلعنا الدور الأول في القسم ودخلني عند ضابط وكان مكتوب أمامه الاسم ده هشام خلف
الضابط قالي: ايه حكايته؟ قولتله عربيتي اتسرقت؟ الضابط رد فورا ومالك مبسوط كده؟ انت مبسوط ان عربيتك اتسرقت؟ بتضحك كده ليه؟!!
ربما نسيت أن أمسح ابتسامة البلاهة والشرود على وجهي بدون أن أشعر من غرابة موقف السيارة لكني رديت عليه قائلا: علشان أنا متفائل انكو تتحركو وتجيبولي عربيتي.
فسألني عن التفاصيل فكررت عليه الحكاية اللي حكيتهالكو. ولما سألني عربيتك نوعيها ايه وموديل سنة كام؟ قولتله دايهاتسو سيريون موديل 2008
قال لي العربية موديل حديث يعني سرقتها صعبة - مش فيها انذار؟
قولتله طبعا فيها انذار وأنا شخصيا مش مقتنع انها اتسرقت لكن أنا مش لاقيها وبالتالي مش عارف هل فيه معنى أخر لإختفاء السيارة غير السرقة؟
فسألني عن تفاصيل المكان اللي كانت فيه السيارة ووصفتله المكان قبل وأثناء الركنة وكمان شكل المكان لما اكتشف اختفاء السيارة.
طبعا لم يخف استغرابه من هذا الموقف ولكنه أوصلني لأمين مباحث اسمه عصام وقاله يعملي محضر سرقة سيارة.
الحقيقة عصام ده علًني على ما عبرني وفتح محضر ولما سألني ايه حكايتك حكيتله التفاصيل تاني ولكنه لم يكن مهتما .. وكان يكتب المحضر بعدم اهتمام وبدون أن يسألني عن أي شيء أخر.. لما أخذ بطاقتي أستوقفه عنواني وسألني هو المستشار وائل حسين ساكن جنبك؟!!!
طيب أقوله ايه ده!!!!
جاريته شوية
قولتله أه ساكن جنبي؟
قالي مليان شوية هو؟
قولتله اه
قاللي عنده عربية نسيان صني قولتله عنده كذا عربية
قالي هو بيته شكله ايه ؟فيلا؟
كنت هاتجنن بس ماسك أعصابي الحمدلله
قولتله لا بيت عادي كل واحد في عيلتهم واخدله شقة
وبعدين قولتله بص هو أصلا محدش بيشوفه دايما مشغول وبيجي متأخر جدا؟
قالي اه ما هو شغال في مكتب النائب العام!
في هذه المرحلة كانت التليفون لا يتوقف وكان القاسم المشترك فيها هو اني اجيب رقم المحضر بسرعة علشان كل الوسايط اللي وصلنالها هتشتغل بيه. والبيه عصام لسه راااااااايق.
الحقيقة الفترة دي طويلة وفيها تفاصيل كتيرة مملة ومالهاش لازمة وكلها بتصب في تضييع الوقت .. لكن هاقولكو على مواقف معينة وهي
1- فوجئت بعد شوية صمت ايه بيقولي امضي على المحضر – طبعا أنا شايفه عمال يكتب ومش بيسأل – قولتله أنا لسه مقولتلك على الحاجات اللي جوه العربية لأن فيه لاب توب جوه العربية. قاللي يبقى لازم تروح لمحمدين بيه – محمدين مين؟؟ - هتلاقيه في المكتب اللي جنبي – وده ماله – قوله انك عايز تثبت اللاب توب في المحضر وشوفه هيقولك ايه؟ وقفل المحضر وكلم واحد تاني وطلع محضر تاني... اروح لمحمدين ألاقي عيل واقف على بابه وحاطط سيجارة على ودنه بيقولي رايح فين؟ - قولتله رايح لمحمدين!! – قاللي محمدين مش هنا دلوقتي – أومال فين؟ - قاعد مع البيه المأمور. – طيب أعمل ايه؟ - استناه لما يخلص. رجعت لعصام قولتله محمدين مش موجود دلوقتي، هو لازم نكلمه علشان نثبت اللاب توب – قالي استناه لما ييجي وقوله. اتخنقت.
2- جالي تليفون من عديلي بيقولي ان أخوه عرف يوصل لواحد من مقاطيع الدقي -على حسب تعبيره – الواحد ده لو أي حاجة اتسرقت في منطقته بيكون عنده علم بيها – برضه على حسب تعبيره – بيقول ان مفيش أي عربية اتسرقت النهارده بس فيه عزاء لواحد مهم جدا في مسجد أسد بن الفرات وكان فيه ناس مهمة جايين العزاء وهما بيجهزوا في العزاء من امبارح بالليل.. خليه يشوف عربيته تكون اتسحبت ولا حاجة .. وطلب مني عديلي اني اروح المرور واسأل على عربيتي في المرور.
طبعا مش عارف أسيب اللي الراجل اللي بيعملي المحضر واروح المرور .. ده غير اني مش عارف أروح مرور إيه وأسأل على أيه.. يعني برضه مش عارف هل المرور هي الجهة المختصة بالموضوع ده؟ أصل مش معقول عربيتي لوحدها متخالفة وكل اللي حواليها مش متخالفة علشان ييجي المرور ياخذ عربيتي من وسط عربيات تانية أصلا!!!!!!!! ده غير انه هيسحبها ازاي وفيه عربية وراها وعربية قدامها...
بس بصراحة انا ساعتها دعيت ربنا من كل قلبي انها تكون اتسحبت!!!!!! 
ليست هناك تعليقات:
إرسال تعليق