يبدو أن فيه اتصالات وصلت لمستوى كبير بعد ساعتين من قعدتي في القسم..
جاء هشام خلف وقال لعصام: خلصت المحضر بتاعه
قاله: لأ هو بس موضوع اللاب توب بتاعه هو اللي معطل المحضر !!!!
لقيت هشام أخذ عصام على جنب وكلمه هامسا..
الحقيقة معرفش كانوا بيتكلموا في ايه لكن بعدها جه عصام ووراني الملف اللي يحفظ فيه ورق المحضر وقاللي:
بص شايف الملف مكتوب عليه ايه – وكان مطبوع عليه كلمة بلاغ هام – شايف الملف نظيف وجديد ازاي ! ده مش زي أي محضر عادي عندنا علشان تعرف بس اني مهتم بيك وواخذ الموضوع بجد... أنا دلوقتي باكتبلك أخطار يروح للأمن العام ومكافحة السيارات ومش فاكر الدوريات أو حاجة تانية المهم انه اخطار هيروح للجهات دي علشان تشوفلي العربية..
قولتله: الاخطار ده هيروحلهم امتى؟
قاللي: انا لسه باكتبه اهوه!! انت مستعجل كده ليه؟
- يا عم عربيتي اتسرقت--- الله!!!!!
الموضوع بعد كده ما اخذش نص ساعة وبعد كده عرفت رقم المحضر وأعطاني رقم تليفونه .. سألته ايه اللي هيحصل بعد كده؟ الأول قاللي لما نلاقيها هنتصل بيك وخذ رقم موبايلي؟ وبعدين لقيته بيقولي ابقى اتصل بيا على يوم الاتنين وأنا أقولك ايه اللي حصل !!!!!!!!!!!!
لم أعلق ولم أتحدث معه بعد ذلك وخرجت من القسم عازما على البحث عن سيارتي بنفسي آملا أن تكون مسحوبة بالونش حتى لو مسحوبة من فوق.
لما خرجنا كان العصر أذن وكانت عندي رغبة إني أمشي لحد المكان اللي كنت راكن فيه ومركبتش تاكسي.. قولت يمكن ألاقيها هنا ولا هنا.. ومشيت لحد ما وصلت مسجد أسد بن الفرات – صليت العصر في المسجد وخرجت لقيت سايس واقف جنب المسجد سألته على الفور: هل فيه ونش جه وسحب عربية النهارده قبل الظهرمن المكان ده؟ - وكنت مشاورا على المكان اللي كانت فيه عربيتي.
قاللي: أيوه فيه عربية اتسحبت النهارده!! كان عندي شعور بالفرحة والغضب في نفس الوقت!!! فرحة لأن فيه أمل فعلا ان عربيتي اتسحبت وما اتسرقت، أما الغضب علشان حاسس بالظلم برضه اشمعنى عربيتي أنا من وسط كل العربيات اللي اتسحبت؟ ايه المخالفة اللي معملتهاش غير عربيتي علشان تتسحب؟
لكن برضه الأمل ده رغم تعلقي بيه كان ساعتها ضعيف برضه لأن المكان لو كان المكان ممنوع الانتظار كنت هتلاقي الصف فضي وكل العربيات يا إما اتشالت يا أما مشيت من نفسها... بس الوضع غير كده خالص .. العربيات كلها واقفة في أمان.
المهم سألته الونش بيودي العربيات فين؟ قاللي روح إسأل في مرور بين السرايات؟
جريت على مرور بين السرايات ولما وصلت وجدت ضابط شاب شكله نظيف مش متبهدل وسألته إذا كان فيه عربية اتسحبت النهارده لأني مش لاقي عربيتي
قاللي روح لمرور الدقي واسأل هناك.. مكنتش عارف مكانه قاللي هاتلاقيه أول ما تدخل شارح محيي الدين أبو العز. انطلقت إلى شارع محيي الدين أبو العز.. ولما دخلت ولم أجد أي شيء يشير إلى قسم مرور في هذه المنطقة أخذت أسأل الناس حتى رد عليا واحد وقاللي انت عايز قسم مرور علشان ايه؟
قولتله أنا مش لاقي عربيتي وجايز تكون اتسحبت وبسأل عليها أسأل فيين؟
قاللي هو انت عربيتك لونها فضي؟ !!! قلبي طلع فوق ونزل تحت
قولتله ايوه
بدت على وجهه ملامح الشفقة وقاللي كانت معدية من أودامي النهارده الظهرية وكانت يا عيني!!!!
قلبي وقع اوي
قولتله طيب هي فين
قاللي روح يا ابني كشك مرور الدقي واسألهم هناك!! - فين الكشك ده؟ - على ناصية الشارع.
رجعت تاني ولقيت فعلا كشك مرور غير واضح غير للي عارف مكانه من الأول وللأسف لم أجد مخلوقا بداخله أو بجواره. انتظرنا شوية يمكن يجي حد.. لقينا عربية ترحيلات وقفت على الناصية التانية ونزل منها عساكرمرور زي الرز وانتشروا واختفوا وسط زحام السيارات. بس لقيت واحد لسه واقف ولابس لون مميز ومختلف عن العساكر.. روحتله وسألته إذا كان له علاقة بالكشك ده؟ قاللي لا أنا كمان بادور على العساكر اللي المفروض يكونوا في الكشك ده!!!
حتى هذه اللحظة كل حركتي كانت على رجلي ولآني مش رياضي ووزني تقيل حبتين كنت خلاص على آخري.. في اللحظة دي وصل محمد نسيبي بسيارة حمايا نجدة لي وعلشان يدور على العربية معايا.
ولما لم يأت أحد إلى كشك المرور المهجور...ولما أن توافرت سيارة نتحرك بيها.. قررت الانطلاق للبحث عنها في الأماكن المتوقعة وبدأت بمرور العجوزة.. كان الساعة قربت على 5 قبل المغرب.. طبعا المكان فاضي تماما ولكن لاقينا عساكر بتلعب في موبايلاتها مع بعض تقريبا كانوا بيبعتوا لبعض بالبلوتوث.. المهم روحت وسألتهم قالولي لا مش هنا هما بيدوا العربيات المسحوبة في ميدان سفنكس أو في أرض اللواء.. روح وشوف في الأماكن دي.
رغم يقيني إنه بيفتي إلا اننا انطلقنا ودخلنا شارع جامعة الدول العربية متجهين إلى سفنكس.. بس في طريقنا وقبل ميدان مصطفى محمود لقينا ونش واقف ولقينا عساكر بتكلبش العربيات والعربيات متكلبشة في الشارع كله.. وقفنا أمام الونش ولقينا ضابط قاعد في الونش ومعاه ورق وعمال يكتب.. قاطعته وسألته على عربيتي وهل هو سحبها النهارده؟ قالي لا مش بنسحب عربيات أصلا بس عربيتك كانت فين؟ قولتله في شارع التحرير عند مركز بحوث الاسكان. قاللي فيه ونش بيبقى موجود تحت كوبري الدقي هو ده اللي تروح تسأله لو كان شاله هيقولك حطها فين.
ركبنا السيارة مرة تانية ودخلنا من شارع أحمد عبدالعزيز ولقينا في أول الشارع علطول واحد ضابط كبير وشكله لواء وقفنا وقولناله الحكاية .. لقيناه اتكلم على طول في اللاسلكي بتاعه : ثلاثة ... ثلاثة...
رد واحد وقاله ايوه يا فندم...
سحبتوا عربية من شارع التحرير النهارده؟
تواني يا فندم خليك معايا ... سبعة... سبعة...
أيوه يا فندم.
سحبتوا عربية النهارده؟؟
أيوه يا فندم عربية بيجو سياحي لونها فضي..
قولناله لا مش بيجو ولا سياحي... قالنا روحوا بس شوفوها .. هما أصلا بهايم مش بيفهموا حاجة. يعني نروح فين؟؟ ... روح كشك مرور الدقي!!!!
ركبنا تاني ودوسنا بنزين ودخلنا من شارع مصدق ثم محيي الدين وبرضه لقينا الكشك مهجور .. روحنا لمرور بين السرايات تاني يمكن نلاقيهم هناك ودخلنا نسأل جوه ولكن كان مشوار على الفاضي
كان التعب قد ملكني تماما.. واليأس قد بدأ يتسلل... لكن فجأة لقينا ونش على شارع التحرير قرب مطعم جاد... هرعنا إليه... لقينا ضابط جالس وبيتكلم في اللاسلكي.. قاطعناه وسألناه على العربية قالنا أنا لسه جاي من الساعة 3 ومسحبتش أي عربية إسألوا سواق الونش هو اللي كان شغال من الصبح مع الضابط اللي قبلي..
طب فين السواق ده؟
هاتلاقيه قاعد على القهوة اللي ورا الشارع ده .. واد تخين كده ولابس....... مش فاكر.
لما وجدناه وسألناه إذا سحب عربية النهارده قال اه سحبنا عربية صيني لونها فضي؟
صيني ايه دي ياباني يا ابني ؟
قاللي يا بيه أنا شيلتهالك بحنية وخذت بالي منها اوي يا بيه.. تديني كام بقة؟
يا عم فين العربية الأول؟
هتلاقيها في شارع مصدق ورا البنزينة اللي على أول الشارع
انطلقنا بسرعة ولفينا من شارع التحرير والملف أمام سينما التحرير ثم دخلنا شارع الدقي ثم الملف عند شارع نوال ثم دخلنا شارع مصدق... بصراحة أنا لما لقيتنا هنعمل كده سيبنا العربية تحت الكوبري وجرينا على رجلينا.. وصلنا لشارع مصدق .. فعلا فيه بنزينة التعاون على الناصية... ووراها بنزينة غاز طبيعي بس وراها شارع وكان على ناصية الشارع دي عمارة تحت الانشاء .... وتحتها وجدت جثة مرمية!!!!!!!!!
لقيت عربية صغيرة كنت شايفها من بعيد شوية وكان واضح من المسافة دي ان الاكصدام مهري والنمرة الخلفية مربوطة بمسمار واحد والتاني مش موجود يعني اللوحة كانت مدلدلة.. قربت شوية أكثر ... لقيتها لونها فضي فعلا... قربت أكثر لقيتها سيريون ... قربت أكثر وقدرت أقرا أرقام اللوحة المدلدلة دي .. لقيتها فعلا نفس أرقام عربيتي...
وقفت تماما وأنا مش مصدق إني لقيت العربية في شارع مصدق. أنا فعلا مكنتش عارف أنا حاسس بايه.. واضح اني فقدت الاحساس.. احساس القهر بنفس قوة احساس الفرحة ... وللأسف احساس القهر زاد بعد كده..
ليست هناك تعليقات:
إرسال تعليق