أيها السلبيون.كلوا استفندى.اتفرجوا على التلفزيون المصرى.واسكتوا

أيها السلبيون.كلوا استفندى.اتفرجوا على التلفزيون المصرى.واسكتوا by Dr-Ahmed Dandarawy on Thursday, February 3, 2011 at 7:00am  يا عم بالا مظاهرات بلا قرف.عايزين ناكل عيش.أقعد فى البيت يا جدعان كفايه مظاهرات ماهو عين نايب وغير شوية وزرا.حلو مش وحش يا شباب العيش والخضار غلى وعايزين ناكل ونروح نشوف مصالحنا فى ناس هو ده مبدئها فى الحياه.ادينى جبنه وعيش وسيب الحكومه تعيش   صحابى اللى عايشين بره بيقولوا الغرب بيقول علينا شعب سلبى وبتاع بطنه تسمعوا عن غاندى؟ عمر المختار؟جيفارا؟ ايوه هوه اللى صورته على الحيطه تعرف يعنى ايه طموح؟ دفع الظلم؟ الساكت عن الحق شيطان؟ شعب متحضر بيتظاهر سلمى؟  طب بلاش...هقولكم حاجه حلوه أوى   انا دخلى فى الشهر اكتر من 3 الاف جنيه عندى عربيه وشقه وبسافر اتفسح بره مصر عمرى ما كنت من الطبقه المطحونه بس خرجت يوم جمعة الغضب وبعدها عشان أقول عايز حق اخواتى المطحونين عايز حق الغلابه فى العشوائيات والقرى والنجوع عايز حق الشاب الغلبان اللى بيتخرج من كليته مش عارف يشتغل مش قادر يتجوز وهيموت.والبنت أهلها اتخنقوا من الانتظار! مش عارف ينزل يخرج مع صحابه عشان معهوش تمن المشاريب! عايز حق البنت الطيبه اللى خرجت من بيتها تشتغل عشان ابوها خلاص مش قادر يديها مصروف   أنا عمرى ما كنت اخوان ولا يمين ولا يسار عمرى ما اعتقلت سياسيا ولا دينيا ولا تم اغتيال اى فرد من عائلتى بس خرجت عشان عشان أقول لأ لظلم وطغيان الداخليه لأ لغشم وجبروت أمن الدوله.لأ لقانون الطوارئ خرجت أقول عايز حق المعتقل السياسى اللى مشافش بيته وعياله من 20 سنه بدون تهمه ولا حتى محاكمه عايز حق اللى اتعذبوا واتقتلوا واتقهروا فى ظلمات أمن الدوله عايز حق دم المصرى البسيط اللى خرج يقول لأ ومعهوش حتى قصافه فدهسته عربية أمن مركزى   أنا بأه معايا فلوس وبشرب ميه معدنيه وعندى كمان فلتر مستورد فى البيت وبشترى أغلى فاكهه وأحسن خضار وبجيب العيش أبو جنيه الفريزر مليان لحمه ومعنديش أى تلاته مشكله لو كيلو اللحمه بقى ب100 ج بس خرجت عشان عايز الناس متشربش الميه اللى كلها بكتريا وفطريات وصرف صحى خرجت عشان الناس اللى بنعالجهم أن وزمايلى من السرطان كتروا أوى خرجت عشان القمح فاسد والمبيدات مسرطنه والأكل كله أمراض خرجت عشان الناس اللى عندهم تليف كبدى فيروسى وفشل كلوى أكتر من اللى عندهم برد   أنا بأه عندى حمام كيلوباترا يعجبك أوى وعندى شاشه دى فى دى 37 بوصه وبلاى ستيشن و2 موبايل وكافة شىء بس خرجت عشان عايز حق الغلابه فى المراكز اللى معندهمش صرف صحى ولسه بيحفروا ترنش عايز حق الست المسنه اللى عندها فوق ال80 سنه ومعندهاش كهربا ولا ميه خرجت عشان الست دى متشتريش جركن الميه -الجربانه- ب20 جنيه ايييييييييييه! محدش فيكوا بيتفرج على برنامج واحد من الناس وغيره وغيره   خرجت عشان مش عايز ضابط الشرطه يبلطج عليه مع انى معملتش حاجه! مش عايز أحس انى خايف وأنا داخل قسم الشرطه ومش عارف أنا خايف ليه! خرجت عشان مش عايز أدفع رشوه فى المرور والشهر العقارى والجمارك والضرايب والبلديه خرجت عشان مش عايز الغاز بتاعنا يروح لاسرائيل بأرخص من التمن اللى بندفعه احنا خرجت عشان مش عايز نحاصر أهلنا المساكين فى غزه واسرائيل بتضربهم بكل انواع القنابل خرجت عشان عايز فلوسى اللى خدها أحمد عز وملياراتى اللى راحت مع نواب القروض خرجت عشان مش عايز بلد ملهاش لازمه تهددنى انها هتقطع عنى مية النيل خرجت وخرج معايا شيوخ ازهر وسلفيين واخوان وعمرو خالد ويساريين وممثلين وأدباء ومسيحين كلنا على كلمه واحد: يسقط مبارك الطاغيه   نسيتم العباره والكام الف اللى ماتوا وحسنى وحكومته سابوا الكلب يهرب نسيتم خالد سعيد ومحمد السيد بلال وكل اللى اتقتلوا لمجرد الاشتباه نسيتم الدكتور المصرى اللى اتجلد فى السعوديه وكرامتنا اللى اتهانت نسيتم الشباب اللى اتضرب برصاص اسرائيل عالحدود ومحدش فتح بأه   اصدقه ليه وهو كل خماسيه بيقول الخماسيه الجايه كل حاجه هتحصل احترمه ليه وهو خلانى مهان فى بلدى وفى بره بلدى وفى كل بلد احترمه ليه ومدير مكتبه السابق قال مبارك لم يكن يهتم بتقرير الشعب اليوميه     عارفين القذافى اللى بعضنا بيتريق عليه!؟ بقاله فى الحكم أكتر من مبارك بس هو مدلع شعبه.مفيش جمارك.العربيات رخيصه.مستوى الدخل مرتفع بياكل بعقل وسايب حته كبيره للشعب.لكن مبارك حكومته سفاحيييين. كل ……. ومتفتحش بأك يا كلب!!! قناة السويس,السياحه,الاثار,الزراعه,الصناعه,الثروه السمكيه,الغاز والبترول فين كل ده يا حراااميه..سرقتونى..وكمان خوفتونى بالداخليه!     محدش يقولى المظاهرات مدسوسه وأمريكا والمعارضه والاخوان وكفايه هيحرقوا البلد أنا محدش حركنى غير احساسى بالظلم والمهانه والسرقه والنهب والقهر ولا فى أى حزب معارضه ولا قوى سياسيه ولا قوى خارجيه تقدر تحرك 4مليون مصرى فى نفس الوقت وتانى يوم الضهر يطلع بلطجية الداخليه ورجال الأعمال المستفيدين من النظام بخيول وأسلحه بيضاء وقنابل غاز وغيره يهجمون على العائلات والستات والبنات والأطفال العزل   اللى هيقول غير كده هحط صباعى فى عينيه.انا وصحابى كنا هناك وشوفنا بنفسنا دانا وصحابى قلنا نروح بعد خطاب الريس ونحكم صوت العقل.مجرد وصولنا رمسيس طلعوا علينا الف بلطجى بيهتفوا لمبارك بأسلحه ونجينا منهم بأعجوبه عارفين.لولا لطف ربنا كنتم سمعتوا عن 6 شباب ماتوا فى عربيه فى رمسيس   اوعى تقولى المتظاهرين السلميين روحوا ليلة الخطاب واللى موجودين الان اخوان ومعارضه على اساس انهم كلموا بلطجية الحكومه على الموبايل وقالولهم نتقابل فى الميدان بكره الضهر ظبطوا المواعيد بعد ماحنا مشينا ونزلوا فارس لفارس فى الميدان واللى يكسب يطلع على قصر العروبه وحلال عليه! .فيلم هندى اخر حاجه   والله وبالله وتالله اللى بينضربوا وبيموتوا وبيتقطعوا فى الميدان هم المتظاهرين السلميين بتوعنا والله وبالله وتالله فيهم ستات وبنات وأطفال ومش عارفين يروحوا ده حتى مصطفى الفقى وكلكم عارفين انه كان مستشار مبارك زمان قال اللى عمل الفتنه والبلبله والضرب ده هو وزير الداخليه وده فكره   وبطايقهم اتمسكت وكارنيهات  أمن الدوله والمباحث وكل الناس شافتهم ده غير ان بعضهم بالفعل اعترف انه داخليه او مرتزقه وواخد 100 جنيه طبعا حبيب العادلى ونواب الشعب اللى هيتزحلقوا مش ممكن يمشوا بهدوء بس السؤال مين اللى جابهم وحكمهم فينا!؟   أنا لم ولن أدعو الى القتال أو محاربة أى مسلم او مصرى مهما كان السبب. ولن أشارك فى نزاع على الحكم أنا اسف جدا لما وصلت اليه الأمور ولما يحدث فى الميدان الان ولكنى لست أحمق .ولن أنسى أن السبب فى كل هذه الفتنه هو مبارك ونظامه ليست المظاهرات السلميه هى السبب.ولكن غرور مبارك ونظامه هم السبب بطش وظلم وقهر وطغيان وجبروت 30 عاما هو السبب وبعد انقشاع الفتنه.سأخرج مره أخرى فى مظاهره سلميه أطالب بتنحى الدكتاتور الظالم   متقليش البنت بتاعة المحور واسرائيل وأنا خنت بابا حسنى وندمانه والله هشتم شتايم وسخه! احنا مش فى سينما الأطفال هنا ومتقليش الجزيره بيكرهونا  وبياخدوا فلوس من اسرائيل عشان يشوهوا صورتنا اسرائيل أكثر دوله فى العالم خسرانه من سقوط مبارك وتدعو الى مساندته مظبطهم طبعا اخر حاجه.غاز وحديد وتطبيع ومحاصرة فلسطين وتهنئه بعيد تأسيس دولتهم طب ماشى الجزيره كخه.والعربيه برده كخه!؟والبى بى سى كخه!؟ والفرنسيه كخه!؟   لما أنا المرفه نسبيا أخرج عشان حضرتك يا أستاذ وحضرتك يا أستاذه وأسيب مرتبتى الماستر بيد وأنام على الأرض عشان خاطركم وتيجى تقولى فى الاخر بلاش خراب فى البلد كفايه كده عايزين نشوف مصالحنا وأكل عيشنا   عارف هقوللك اييييييه؟؟؟؟؟   هقولك يكفيك كام كيلو استفندى وتتفرج على التلفزيون المصرى وتقعد ساكت؟