كان واضح ان الونش شايل العربية من ظهرها لأن الاكصدام الخلفي وباب الشنطة بيعبروا عن كده بكل أسى... ووضعية السيارة والعلامات اللي على الأرض بتقول ان الونش رماها في المنطقة دي بكل ما أوتي من عفاشة وغباء وتخلف وعربدة ولامسئولية. ولما نظرت للإطارات الأمامية وجدتها وقد تآكلت من الجر.. طبعا العربية أتوماتيك والطبيعي عندما تترك سيارتك وتغادرها تضع الفتيس على وضعية (P) وده بيخلي العربية ما تتحركش تماما لو زقيتها لأنها ماسكة الإطارات الأمامية بشدة..
لذلك تخيل معي الونش وهو بيسحب العربية والعجل الأمامي مش بيلف معاه ... يعني ثابت وبيحك في الأرض.. للأسف ده اللي حصل
ودي صور لإطارات العربية بعد ما غيرتها
المهم قولت مش مشكلة خليني اروح دلوقتي وأنام بقى وانسي كل اللي حصلي ده ... وفتحت عربيتي وأول ما شغلتها دارت الحمدلله ... لكن واضح انها كانت مصدومة نفسيا هي كمان!!!
لأن كان الموتور عمال يدوس بنزين مع نفسه من غير ما أعمل حاجة ... كأني باحط رجلي على دواسة البنزين للآخر وبعدين أشيلها.. مع التكرار المستمر وبدون توقف... قولت أجرب أتحرك بيها ... لكن أول ما نقلت الفتيس من (P) إلى (R) العربية دايسة بنزين مسبقا ومش محتاجة إذن حركة من رجلي وبتجري بسرعة لورا!!!
غيرت الفتيس من (R) الى (D) برضه في قفزة طلعت للأمام... وقفت العربية .. الأول ما فهمتش اللي حصل ... لكن تذكرت أن عربيتي زي معظم عربيات مصر جر أمامي... يعني التروس بتاعة العربية مرتبطة بالعجل الأمامي.. والعجل لم يلف على الأرض أثناء سحب العربية زي ما قولنا قبل كده .. والأهم أن الفتيس أتوماتيك... يعني دخلنا في مشكلة فتيس أتوماتيك.. وما أدراك ما الفتيس الأتوماتيك... يعني من 7 آلاف ل 20 ألف جنيه تقريبا...
حسبنا الله ونعم الوكيل...
قابلت الواد المفعوض اللي شال عربيتي بالونش ...
-- ها يا بيه لقيت عربيتك J
-- أيوه لقيتها ... ولقيت اكصدامها متكسر ونمرها على الأرض والعجل متاكل والفتيس باظ...
-- ها؟؟ لا مش أنا اللي سحبت العربية ... ده شعراوي هو اللي سحب العربية ....
-- إنت هتستعبط ... مش انت اللي قايلي انك راميها في شارع مصدق.!!!!
-- يا بيه أنا ماليش دعوة مش أنا اللي شيلتها ... بص شايف الراجل ده ... هو اللي كان معايا الصبح روح قوله.
الراجل كان يبدو انه لواء أو رتبة كبيرة وكان عصبي جدا وبيكلم أكثر من احد في نفس الوقت ... أنا ماكنتش عارف أروح أقوله ايه ولا أعمل ايه بس كان نفسي أقدر أمسكه وأضربه ... بس للأسف أنا اللي ساعتها هأكون غلطان.. الحوار معاه فعلا مجبش نتيجة وفي النهاية بيقولي انتي جايلي انا ليه ما تروح تشوف الراجل اللي شال عربيتك وتكلمه هو .. ومشي!!!!!!!!!
فقدنا الأمل في اني آخذ حقي من الحرامية اللي بوظوا عربيتي بدون أي وجه حق .. وحاولت أركز على أني الوضع كده أحسن من سرقة العربية كلها وإن عثوري عليها بايظة أحسن من عدم عثوري عليها خالص ....
خلفية الأحداث التي لم أعرفها إلا بعد ذلك: كانت كالتالي،
الضابط اللي كان موجود الصبح كان عايز يفضي المنطقة اللي كانت فيها عربيتي حتى يضع فيها سيارات البوكس تبعه أو السيارات بتاعة الناس المهمة اللي جاية مش متأكد علشان إيه لكن المهم ان المكان ده مناسب بالنسبة ليه ولازم يفضيها... وأمر الونش يشيل كل العربيات اللي المكان ده ... وكان من نصيبي ان السيارة اللي كانت ورايا مشيت .. لا أعلم هل كان موجود في هذا الموقف ومشي لما لقى الونش ولا كان مشي من الأول لكن كان نصيبي أني أكون أول عربية تتشال..
ونظرا لأن فيه عربيات أمامي فقرر الغبي يشيل العربية من ظهرها.. حتى لو ده معناه أن الونش يقف ويمشي عكس الاتجاه.
سحب عربيتي ومشي من شارع التحرير ثم شارع محيي الدين ثم شارع مصدق... وتركها في المكان اللي أنا لقيتها فيه...
العجيب .. أن الضابط تراجع عن استكمال سحب العربيات.. لا أعرف لماذا... هل لآن العزاء لسه بالليل وأحنا لسه قبل الظهر؟ هل لأن عدد السيارات اللي هيشيلها كثير أوي وهياخذ وقت طويل ومش لاقي أماكن كافية يقدر يرمي فيها العربيات دي؟ هل كل الأسباب دي مع بعض؟
اللي عرفته انه أجل اخلاء المنطقة دي لبعد المغرب وخلاص والدنيا هديت تاني والعربيات رجعت تركن في هذا المكان وده اللي فسرلي إزاي المكان رجع طبيعي والعربيات راكنة هنا عادي رغم ان عربيتي الوحيدة اللي اختفت و اتبهدلت واتمرمطت...
الأعجب من كده:
عسكري مرور بيقف في شارع مصدق ومكانه بالضبط بجوار مكان عربيتي بعد ما اترمت... لما لقى العربية حط عليها مخالفة انتظار في الممنوع!!!!!!
الحقيقة مقدرتش أتأكد هل هما طابخينها سوا ولا هو مالوش علاقة بالونش وكان شايف شغله -- الرخم!!
لكن لما عرفنا كده كلمناه وشلنا المخالفة.
بما إن أغلبكو زهق من المسلسل اللي حصللي هأختصر الباقي :
روحنا للقسم تاني اللي عملت فيه المحضر علشان لازم اقوللهم اني لقيت العربية ... وطبعا مارضيوش يثبتوا أي حاجة لما عرفوا ان الونش والعزاء والتفاصيل دي.. وقالولي لو انت عامل تأمين شامل على عربيتك ممكن نعمل محضر ومعاينة والتأمين هيغطيلك كل حاجة.. غير كده مالهاش لازمة... وبما إني مش مأمن على عربيتي وبما ن محدش بينزل يعمل معاينة في مكان الحادث وكان لازم أجيب عربيتي في القسم رغم المشكلة اللي كانت فيها ... قرفت منهم ومشيت.
اتصلت بشركة انقاذ سيارات واتفقت معاها تشيل عربيتي لحد التوكيل وده كان يوم السبت اللي بعديه
وفي التوكيل قالوا هنفحص الفتيس ونشوف إذا فيه حاجة بايظة ولا لأ؟ بس الفحص ده هيكلفني 850 جنيه ولو طلع فيه حاجة بايظة في الفتيس وهنعمل عمرة التكلفة هتوصل ل 1500 + قطع الغيار!!!
طيب قطع الغيار دي ممكن توصل معايا لكام؟؟؟
راح سأل على قطع الغيار بتاع الفتيس ورجع قالي ابتداء من 7000 إلى 20 ألف جنيه.
إنا لله وإنا إليه راجعون.
سيبت العربية في التوكيل ودعينا ربنا يلطف بينا
يا جدعان في التعليقات محدش راضي يعلق ليه؟؟
ردحذف